Uitgereik deur Christo van der Rheede namens die FW de Klerk Stigting op 13/09/2024

Die FW de Klerk Stigting betuig sy diepste meegevoel met die familie en geliefdes van die voormalige Minister Pravin Gordhan, wat vanoggend op die ouderdom van 75 oorlede is. Die Stigting erken Pravin Gordhan se onskatbare bydraes tot Suid-Afrika se grondwetlike demokrasie.

Gordhan, wat Suid-Afrika se eerste kommissaris van die Suid-Afrikaanse Inkomstediens (“SAID”) was en twee keer as minister van finansies gedien het, het uitsonderlike toewyding aan openbare diens getoon.

Christo van der Rheede, die Uitvoerende Direkteur van die FW de Klerk Stigting, stel dit soos volg: “Pravin Gordhan se impak op Suid-Afrika se bestuur en sy rol in die verdediging van ons demokrasie sal met groot deernis en respek onthou word. Sy optrede tydens ‘n tydperk van geweldige politieke druk was noodsaaklik vir die beskerming van die demokratiese raamwerk van ons nasie. Sy onwrikbare vasberadenheid teenoor staatskaping beliggaam die gees van integriteit en aanspreeklikheid wat ons Grondwet onderlê. Ons treur oor sy heengaan en eer sy blywende bydraes tot ons nasie.”

Gordhan sal onthou word vir sy vasberadenheid aan ons grondwetlike waardes en sy moedige stand teen korrupsie, veral teen staatskaping.