Uitgereik deur Daniela Ellerbeck en Ismail Joosub namens die FW de Klerk Stigting op 17/09/2024

Die FW de Klerk Stigting kondig graag aan die bekendstelling van sy Programme vir Grondwetlike Regte en Grondwetlike Bevordering. Hierdie twee afsonderlike programme sal poog om die Stigting se doelwit om Suid-Afrika se grondwetlike demokrasie ‘n werklikheid vir alle burgers te maak, beter te bereik.

“Die Program vir Grondwetlike Regte vervang die voormalige algemene Grondwetlike Program,” sê Daniela Ellerbeck, ‘n prokureur en die FW de Klerk Stigting se bestuurder van Grondwetlike Regte Programme. “Die doel daarvan is om die Grondwet te beskerm en te bevorder,” verduidelik Ellerbeck, “spesifiek deur betrokke te raak by kwessies, wetsontwerpe of beleide wat die Grondwet se grondliggende waardes of sy Handves van Regte sou ondermyn, om sodoende die regte en vryhede van alle Suid-Afrikaners te beskerm.”

“Die Program vir Grondwetlike Bevordering is ‘n nuwe inisiatief van die Stigting,” verduidelik Ismail Joosub, die bestuurder van die Stigting se Program vir Grondwetlike Bevordering. “Dit sal hoofsaaklik op die jeug fokus, deur hulle toe te rus om aktiewe burgers in Suid-Afrika se grondwetlike demokrasie te wees. Ten einde hierdie doelwit te bereik, is die Program besig om verskeie universiteitstakke te loods.”