Die slegte nuus is dat hy gedwing is om tot ‘n vergelyk te kom en ‘n paar “Zumaites” in die Kabinet te hou, hoofsaaklik in minder strategiese en ekonomies onverwante portefeuljes. Dit geld vir Malusi Gigaba (Binnelandse Sake), Nomvula Mokonyane (Kommunikasie), Ayanda Dlodlo (Staatsdiens en Administrasie) en, miskien mees teleurstellend, Bathabile Dlamini (Die Presidensie, Vroue).
Die aanstelling van David Mabuza as Adjunkpresident is beslis ook ‘n kompromie, asook die aanstelling van dr Nkosazana Dlamini-Zuma as Minister van Beplanning, Monitering en Evaluering in die kantoor van die Presidensie. Miskien is die gesegde dat jy jou vriende naby moet hou, en jou vyande nog nader, hier van toepassing.
Daar is ‘n paar keuses wat nie so duidelik is nie. Dit sluit in die aanstelling van ‘n Zuma-lojalis in die belangrike portefeulje van Landelike Ontwikkeling en Grondhervorming (Nkoana-Mashabane). Dieselfde geld vir die behoud van die luide Lindiwe Zulu as Minister van Kleinsake-ontwikkeling. Maar, soos sommige kommentators het opgemerk, kan sommige van die portefeuljes wat onaangeraak gelaat word, in ‘n finale, kleiner Kabinet verdwyn.
Die ander belangrike maatstaf om die keuses in die kabinet te meet, is President Ramaphosa se strewe om ‘n grootmoedige en konsultatiewe styl na te volg, en veral sy strategie om die spel op die lang termyn te speel. In ‘n paar gevalle kan die wet sy gang gaan, en van diegene wat hy noodgedwonge moes hou, ontslae raak. Dit is ook waar dat dit inderdaad ‘n tussentydse Kabinet is, met ‘n finale Kabinet wat eers na die algemene verkiesing in 2019 daargestel sal word. Dit kan ook wees dat sodra die navorsing oor ‘n kleiner Kabinet voltooi is, daar in elk geval veranderinge sal wees.
Die nuwe Ramaphosa-kabinet toon sterk tekens van belofte. Dit is ‘n skuif na skoon en goeie regering, gebaseer op grondwetlike beginsels. Dit toon ook tekens van toegewing, maar met ‘n verkiesing wat op die horison dreig, is toegewings te verwagte. Dit moet aktief bestuur word sodat dit nie die belowende skuif na konstitusionalisme ondermyn nie, en ook nie die dringende take om korrupsie, staatskaping en afpersing te bekamp nie.
Deur Theuns Eloff: Uitvoerende Direkteur, FW de Klerk Stigting
27 Februarie 2018
Foto: www.sabc.co.za
