{"id":3013,"date":"2015-04-20T13:32:00","date_gmt":"2015-04-20T11:32:00","guid":{"rendered":"https:\/\/fwdeklerk.org\/artikel-die-ontplooiing-van-die-sanw-en-die-sapd-om-xenofobiese-geweld-te-onderdruk\/"},"modified":"2021-05-24T01:07:42","modified_gmt":"2021-05-23T23:07:42","slug":"artikel-die-ontplooiing-van-die-sanw-en-die-sapd-om-xenofobiese-geweld-te-onderdruk","status":"publish","type":"post","link":"https:\/\/fwdeklerk.org\/af\/artikel-die-ontplooiing-van-die-sanw-en-die-sapd-om-xenofobiese-geweld-te-onderdruk\/","title":{"rendered":"ARTIKEL: DIE ONTPLOOIING VAN DIE SANW EN DIE SAPD OM XENOFOBIESE GEWELD TE ONDERDRUK"},"content":{"rendered":"

 <\/p>\n

Gegewe Suid-Afrika se geskiedenis en die gebruik van die weermag in townships voor die instelling van demokrasie in 1994 om regmatige betogings te onderdruk, is dit verstaanbaar dat hierdie jongste ontwikkeling kommer kan wek. Daarbenewens het die onlangse vlaag xenofobiese aanvalle en die beelde van hierdie dade emosies regoor die land aangeroer, en herinner aan die soort geweld wat ons nooit weer in Suid-Afrika wil ervaar nie. Gevolglik, en om verstaanbare redes in hierdie konteks, is die laaste ding wat Suid-Afrikaners wil sien die terugkeer van soldate om reg en orde op ons strate te handhaaf.<\/p>\n

Om daardie rede – afgesien van die erkenning van die behoefte aan die ontplooiing van die SANW in Suid-Afrika onder sekere omstandighede – reguleer die Grondwet en die Defence Act<\/em> van 2002 duidelik wanneer en hoe die SANW in die hoedanigheid van wetstoepassing ontplooi mag word, en hoe die Parlement ten alle tye toesighouding sal uitoefen ten opsigte van sodanige ontplooiing.<\/p>\n

Die hoofdoelwitte van die SANW is om die Republiek, sy territoriale integriteit en sy mense te verdedig en beskerm in ooreenstemming met die Grondwet en die beginsels van internasionale reg wat die gebruik van geweld betref. Artikel 201(2)(a) van die Grondwet maak egter daarvoor voorsiening dat die President die ontplooiing van die SANW in samewerking met die SAPD kan goedkeur, bo en behalwe die ontplooiing ter verdediging van die Republiek of ter uitvoering van ‘n internasionale verpligting. Artikel 19 van die Defence Act <\/em>gee uitdrukking aan hierdie grondwetlike bepaling deur te bepaal dat die SANW in samewerking met die SAPD ontplooi mag word kragtens artikel 201(2)(a) van die Grondwet om misdaad te voorkom en beveg en om reg en orde in die Republiek te handhaaf en bewaar. Die President of die Minister mag, kragtens artikel 18 van die Defence Act<\/em>, ook die ontplooiing van die SANW magtig vir dienste buite Suid-Afrika, of in internasionale waters, ten einde lewens, gesondheid of eiendom in noodgevalle te bewaar of om humanit\u00eare hulp te verleen; om die lewering van noodsaaklike dienste te verseker; om enige staatsdepartement te steun, met inbegrip van steun ten opsigte van sosio-ekonomiese opheffing; en om nasionale grensbeheer toe te pas. Die SANW is voorheen en op baie geleenthede ontplooi om al die bogenoemde funksies op een of ander stadium uit te voer, en het dit goed gedoen.<\/p>\n

Desnieteenstaande is nasionale sekuriteit onderhewig aan die gesag van beide die Parlement, as verteenwoordigers van die mense, en die nasionale uitvoerende gesag. Wanneer die President dus die SANW ontplooi kragtens die bogenoemde grondwetlike bepalings, moet hy kragtens artikel 201(3) van die Grondwet die Parlement \u201converwyld en in gepaste besonderhede verwittig van (a) die redes vir die aanwending van die weermag; (b) enige plek waar die mag aangewend word; (c) die getal mense wat daarby betrokke is; en (d) die tydperk waarvoor die mag na verwagting aangewend sal word.\u201d Indien die Parlement nie tydens die eerste sewe dae na die ontplooiing sit nie, moet die President die inligting aan die toepaslike toesighoudende komitee oordra. Daarbenewens vereis artikel 19(2) van die Defence Act<\/em> dat die Minister kennis van sodanige ontplooiing in die Staatskoerant gee binne 24 uur van die aanvang van sodanige ontplooiing en, wanneer sodanige ontplooiing gestaak word, moet hy of sy binne 24 uur kennis gee van die staking daarvan.<\/p>\n

Wanneer die SANW ontplooi word kragtens artikel 201(2) van die Grondwet, bepaal artikel 19(3) dat daardie diens deur lede van die SANW in samewerking met die SAPD:<\/p>\n

a. slegs uitgevoer kan word in sodanige gebied of by sodanige plek as wat die President kan beveel op versoek van die Minister van Verdediging en Minister van Polisie;<\/p>\n

b. gestaak word in sodanige gebied soos wat die President kan beveel op versoek van die Minister van Verdediging en Minister van Polisie, of wanneer die President dit raadsaam ag om enige ander rede; en<\/p>\n

c. uitgevoer moet word in ooreenstemming met:<\/p>\n