{"id":1719,"date":"2019-06-24T08:00:00","date_gmt":"2019-06-24T06:00:00","guid":{"rendered":"https:\/\/fwdeklerk.org\/artikel-verdien-mnr-lesufi-n-slaagpunt\/"},"modified":"2021-07-20T21:00:11","modified_gmt":"2021-07-20T19:00:11","slug":"artikel-verdien-mnr-lesufi-n-slaagpunt","status":"publish","type":"post","link":"https:\/\/fwdeklerk.org\/af\/artikel-verdien-mnr-lesufi-n-slaagpunt\/","title":{"rendered":"ARTIKEL: VERDIEN MNR LESUFI \u2018N SLAAGPUNT?"},"content":{"rendered":"

Mnr Lesufi het \u2018n luisterryke struggle geskiedenis, veral vir iemand wat nou maar 51 is. Volgens sy amptelike profiel was hy in 1985 (op 17-jarige ouderdom) in aanhouding as apartheidsaktivis. Hy het in 1995 (nogal n\u00e1 die eerste demokratiese verkiesing van 1994) weer in \u2018n Durbanse tronk beland – skynbaar omdat hy \u201cho\u00ebr onderwys se transformasie-agenda gedryf het\u201d. Wat sy oortreding was, word nie geopenbaar nie. Dit word ook nie ges\u00ea waarin en of hy \u2018n eerste graad aan die destydse Universiteit van Natal behaal het nie. Hy het wel \u2018n MBA (maar ons weet nie van watter universiteit nie). Hy het reeds diep spore in die ANC in Gauteng getrap en is adjunk voorsitter van die organisasie in Gauteng.<\/p>\n

Maar wat is mnr Lesufi se baanrekord in onderwys as LUR in Gauteng? Een van die dinge waarop hy (tereg) baie klem l\u00ea, is dat elke kind in Gauteng toegang tot kwaliteit onderrig moet h\u00ea. Aan die begin van elke jaar sukkel Gauteng egter met tienduisende leerders wat nie geplaas kan word nie, omdat skole oorvol is. Daarom het mnr Lesufi in 2014 belowe dat hy 1 000 (een duisend) nuwe skole in die volgende klompie jare gaan bou. \u2018n Mens moet aanvaar dat hy die begroting om hierdie reusetaak te verrig, beskikbaar gehad het. Daar stroom na beraming jaarliks tussen 50 000 en 70 000 nuwe leerlinge vanuit naburige provinsies na Gauteng, en daarom moet ten minste 50 nuwe skole per jaar gebou word.<\/p>\n

Hoeveel skole is daar op mnr Lesufi se \u201cwagbeurt\u201d (soos hy graag self s\u00ea) die afgelope vyf jaar in Gauteng gebou? Volgens die Gautengse Departement van Onderwys self is daar in 2014\/15 dertien skole gebou, in 2015\/16 sestien, in 2016\/17 agt, in 2017\/18 \u2018n skrapse ses en net vier in 2019.<\/p>\n

Van die totaal van 1 000 wat hy belowe het, het hy slegs 47 gebou – 4.7% van wat hy beloof het.<\/p>\n

Maar dalk is hierdie skole ten minste modelskole, goed toegerus en top presterend? Helaas nie. Die media dra die afgelope paar jaar telkens stories van nuwe skole wat swak toegerus is, of\u00a0\u00a0waar rekenaars gesteel word omdat daar nie voldende sekuriteit is nie. In ander nuwe skole word rekenaars in kaste toegesluit omdat daar nie internet-toegang is nie. \u2019n Ho\u00ebrskool in Olievenhoutbosch het \u2019n splinternuwe sentrum vir verbruikerswetenskappe, met blink stowe en yskaste, maar nie genoeg kooktoerusting om die vak behoorlik aan te bied nie. \u2019n Laerskool in Tembisa moes hul laboratorium en rekenaarsentrum in klaskamers omskep, omdat die skool aanvanklik met te min klaskamers gebou is. Hulle het dus net \u2019n biblioteek, wat boonop karig toegerus is, met net enkele boeke wat nie relevant is tot laerskoolleerlinge nie. Postevoorsiening vanaf die departement vir al die skole is te min en klasse het tussen 50 en 80 leerlinge elk.<\/p>\n

\u2018n Ander probleem wat mnr Lesufi veroorsaak is dat hy dikwels die grense van sy verantwoordelikhede as politieke hoof van die Departement oorsteek en sommer self bestuurshoof speel – en dan uitsprake maak oor alles en nog wat. Daarmee neem hy die pligte van die onderwyshoof van die provinsie by die aangestelde amptenaar oor. Daarby skiet hy ook dikwels van die heup af – dink maar waar hy addresse van onderwysers wat later onskuldig aan rassisme blyk te gewees het, op sosiale media versprei het.<\/p>\n

Moet mnr Lesufi \u2018n slaagpunt hiervoor kry? Oordeel maar self… Toegegee, sy mediaprofiel is hemelhoog en hy lyk en klink of \u201ciets doen\u201d… maar die feite bewys die teendeel.<\/p>\n

Onder Afrikaanstaliges is mnr Lesufi natuurlik meer berug, veral oor sy houding oor Afrikaans in Gauteng se openbare skole. Hy en sy verdedigers hou vol dat hy niks teen Afrikaans as onderrigtaal in skole het nie, hy is net ernstig oor integrasie in skole. Maar in Mei 2019 (op nasionale TV) is hierdie mite aan flarde geskiet toe hy hom klaarblyklik vir \u2018n vraag oor die elektroniese rekenaarstelsel vir nuwe toelatings vervies het. Die strekking van sy opmerking was in die lyn van \u201cWaarom veg mense vir Afrikaanse onderrig, daar is tog nie meer Afrikaanse universiteite in Suid-Afrika nie? Ek beskerm eintlik hierdie leerders sodat hulle nie in \u2018n taal leer waarin hulle nie verder kan studeer nie\u201d. Afgesien daarvan dat dit feitelik verkeerd is (NWU-Potchefstroom en Stellenbosch bied nog Afrikaanse onderrig aan), is dit neerbuigend en arrogant verby. Ek, die grote Lesufi, beskerm hierdie klomp Dutchmen teen hulleself! Ek help hulle om nie in hierdie agterlike taal\u00a0\u00a0te studeer nie. Dit is natuurlik ook \u2018n selfdienende argument: mnr Lesufi se ander ANC-kollegas en -gesindes maak seker dat Afrikaans op universiteit vernietig word, en hy voltooi die sirkel deur seker te maak dat daar nie meer vir Afrikaans \u2018n aanvraag sal wees nie!<\/p>\n

\u2018n Gunsteling gesegde van mnr Lesufi is dat daar onder sy leierskap nie (meer) skole vir \u201cklein basies\u201d sal wees nie. Afrikaanse skole is dus eintlik maar wit skole en sit apartheid voort. Daar is twee foute met hierdie argument:<\/p>\n